JUAN KABATAAN: Panalangin Para Sa Malinis Na Halalan

WRITER’S NOTE: Napakasaya kong likhain ang dasal na ito dahil para sa akin, panalangin ang isa sa mga pinakamakapangyarihang sandata nating mga Pilipino upang makamit natin ang maayos at malinis na halalan. Nawa’y maging hudyat si Juan Kabataan upang mapanatili natin ang kapayapaan sa eleksyon, hindi lang sa paparating na Mayo 13, kundi sa mga susunod pang halalan sa lungsod ng Maynila na aking ikinararangal at sa ating bansang labis na minamahal.

Isang produksyon ng KATIPUNAN NG KABATAANG MAAASAHAN


JUAN KABATAAN
PANALANGIN PARA SA MALINIS NA HALALAN

Panginoon, kami’y nagpapasalamat sa bigay Mong buhay —
buhay na Iyong itinakda upang pangalagaan ang mundong Iyong obra;
buhay na Iyong pinahiram upang ibahagi sa aming kapwa;
at buhay na Iyong binigyang lakas upang paunlarin ang lipunang Iyong likha.

Ngayong eleksyon ay hinihingi namin ang Iyong gabay —
gabay para sa mga kakandidatong lider ng lungsod naming mahal;
gabay para sa mga magbabantay ng mga balotang kinalalagakan ng mga inihalal;
at gabay para sa mga boboto, gamit ang talino, dangal at mataimtim na dasal.

Amang kataas-taasan, hangad namin sa halalang ito ang pag-unlad —
pag-unlad na magpapaginhawa sa buhay ng bawat nangangailangan;
pag-unlad na magsasaayos sa sistema ng magsisilbi sa pamahalaan;
at pag-unlad na magdadala sa lahat ng magandang kinabukasan.

Nawa kaming mga kabataan ay magsilbing Iyong imahe —
imahe ng mamamayang nagtitiwala sa mga manunungkulang uupo;
imahe ng konsensyang nagpapaalalang maging tapat ang mga partidong tatakbo;
at imahe ng pwersang handang tumulong at makiisa sa mga bubuo ng gobyerno.

Buong pananampalataya kaming dumadalangin;
Nawa’y Iyong pakinggan at dinggin;
Ang aming papuri, parangal at pinagsama-samang hangarin;
Sa Iyo’y inaakyat namin.

Para sa aming hinahangad na masaganang kinabukasan, para sa Pilipinas na aming mahal na Inang Bayan, at para kay Hesukristong aming nag-iisa’t dinadakila naming Panginoon.

Amen.

FAST POST #14: Dahilan Ka Ng Isang Milyong Komedya

(Para Sa Hari Ng Komedya Sa Pilipinas, SLN)

I. biro
ang batang Tundo
na nagtitinda
ng mani’t pakwan
sa harapan ng
isang sinehan,
nasa gitna ng
dusa at luksa
ng kahirapan,
pero siya ay
nagsumikap na
malagpasan ang
mga biro ng
mundo’t tadhana.

II. ngiti
sya nga si Golay,
ang namamayat
na mananayaw
at mang-aawit
sa entablado,
dugo ay bayan
ang unang labas
sa pelikula,
at kalauna’y
nagpasimulang
magpangiti sa
telebisyon sa
buhay artista.

III. bungisngis
sya nga si Pidol,
isang artistang
sumimbulo ng
bumubungisngis
na Pilipino,
ang manggagawang
nagmamahal sa
kanyang pag-arte,
tatay ng bayan,
baklang palaban,
at sagisag ng
realidad ng
ating lipunan.

IV. tawa
si Pacifica,
Fefita’t Omeng,
John Puruntong man
o Kevin Cosme,
si Markova at
Father Jejemon,
artistang walang
limitasyon sa
pagpapatawa,
walang inindang
anumang pagod
sa sambayanan.

V. halakhak
higit kumulang
na ngang pitumpung
taong halakhak
ang iniambag
sa mga Pinoy
mula pa noon
hanggang sa ngayon,
ang komedya nyang
inihain sa
Pilipinas ay
mananatiling
kayamanan at
kasaysayan.

VI. komedya
haring tunay ng
komedyang Pinoy,
hindi luha ang
aming pabaon
sa’yong pagpanaw,
dahilan ka ng
aming pagbiro,
ng pagpapangiti,
ng pagbungisngis
at ng pagtawa,
pagdiriwang ng
iyong buhay ang
aming pagtanaw.

VII. alamat
ang Panginoon
ay sobrang saya
sa’yong pagbalik
sa Kanyang piling,
isa kang tunay,
walang kapantay
na ngang alamat
ng pinilakang
tabing ng Pinas,
kami’y saludo
sa’yong dakilang
kontribusyon sa
iyong larangan.

MABUHAY KA, MANG DOLPHY.
MARAMING SALAMAT!
MANANATILING KAMING NGINGITI
AT PANANATILIHING BUHAY
ANG MASAYA MONG ALAALA.

 

 

Rodolfo “Dolphy” Vera Quizon, Sr. (July 25, 1928-July 10, 2012)

Photo courtesy of ABS-CBN News Online

“SMOKE FREE SA MAYNILA” – Ang Hakbang Ng Lungsod Sa Umuusad Na Pagbabago

Kung inyo pong matatandaan ay ipinaskil ko ang larawang ito sa aking nakaraang post:

Nitong Nobyembre 11, 2011 ay inilunsad ng Lungsod ng Maynila ang isang kampanyang magpapaigitng ng mga simple ngunit makabuluhang pagbabago bilang isang Manilenyo at mamamayang Pilipino.

Tinaguriang “Smoke Free Sa Maynila: Kalusugan ay Pahalagahan, Kalikasan Ay Pangalagaan”, ang kampanyang ito ay inilunsad ng pamahalaang lungsod noong Biyernes, 11-11-11 sa Bonifacio Shrine, sa tapat ng Manila City Hall.

Isa itong programa kung saan binibigyang halaga ang mga simpleng pamamaraan ng pagbabago sa ating sarili upang makatulong sa ating kalusugan at kapaligiran. Kasabay ng paglulunsad ay ang sabayang parada ng ilang sektor sa anim na distrito ng Maynila upang masigurong maipaalam sa lahat ang bagong pinagtutuunan ng lungsod sa pamumuno ni Kgg. Alfredo S. Lim.

Inaasahan na magiging maigting ang kampanyang ito dahil sa lumalalang bilang ng mga nagkakasakit dahil sa pag-abuso sa paninigarilyo, unhealthy lifestyle at dumuduming kapaligiran.

SMOKE FREE SA MAYNILA, inilunsad sa Bonifacio Shrine, Manila City Hall

Mula sa Unang Distrito ng Maynila ang video na ito na kumakampanya sa SMOKE FREE SA MAYNILA