FAST POST #6: Tanggapin Kung Ano Ang Naabot ni Shamcey

Napa-update ako ng blog nang di oras dahil naintriga ako sa mga komentong aking naririnig tungkol sa pagpuwesto ni Shamcey Supsup bilang 3rd runner-up sa katatapos lang na 60th Miss Universe sa Sao Paolo, Brazil.

 

Sa TV Patrol ko lang natunghayan ang mga detalye sa naganap na kompetisyon. Sa Question and Answer portion ng Final 5, marami ang nagsasabi na si Supsup lang ang gumamit ng wikang Ingles sa pagsagot ng katanungang binigay sa kanya, samantalang ang iba’y gumamit ng kanilang katutubong wika. Marami rin ang mga nagkomentong napakahusay ng pagtugon nito sa tanong na kung ano ang kanyang pipiliin sa pagitan ng kanyang sariling relihiyon at sa relihiyon ng kanyang mapapangasawa.

 

Narito ang apat na komentong rumehistro sa isip ko matapos kong marinig ang kanyang naging sagot:

 

1. Kung nakaramdam siyang hindi ganoong kagaling mag-Ingles ang mga makakasama niya sa Top 5, sana’y humiling din siya ng interpreter para maging patas ang pagsagot ng mga tanong.

2. Maganda ang kanyang sagot dahil mas pinatatag nito ang pagpapatunay na matibay ang mga Pilipino pagdating sa ating pananampalatayang Kristiyano.

3. Bagama’t lubhang kanais-nais ang pagtugon ni Supsup, mas angkop siguro kung mabilis niyang tinimbang ang halaga ng relihiyon at pag-ibig. Bakit? Nirerespeto ko naman ang kasagutan niya pagdating dito, pero lumabas kasing naging demanding ang kanyang sagot na kung mahal siya ng kanyang mapapangasawa, “HE SHOULD LOVE MY GOD TOO”. Naging authoritarian ang dating at hindi naging patas ang dating nito kung pakikinggan. Mas mabuting naisip niya rin na lahat ng tao sa mundo ay may iisang Diyos na may iba’t ibang pangalan, base sa kinalakhang pananampalataya.

4. Halatang kabado siyang sumagot. Siguro’y mas bigyang pansin ng mga susunod pang sasali sa Miss Universe ang tamang postura o diskarte kung sasagot sa final question na hindi halatang kinakabahan. Ganun din kasi ang naging kaso nina Miriam Quiambao noong 1999 at ni Maria Venus Raj noong nakaraang taon.

 

Maganda ang naging resulta ng pagkapanalo ni Raj bilang 4th runner up noong Miss Universe 2010 dahil nagbigay ito ng pagkakataon upang mapag-aralang mabuti ni Supsup ang dapat niyang gawin sa naturang beauty pageant. Pero hindi pa rin tayo nagtagumpay na muling masuot ng isang Pilipina ang pinakamataas na karangalan ng kagandahan sa daigdig. Maaaring hindi ito ang panahon dahil para sa akin, nagawa na ni Supsup ang pianakamagandang bagay para lang muli nating masungkit ang minimithing korona. Ang karangalan ay mananatiling karangalan, at sa pagiging pangatlong pinakamagandang babae sa mundo ng ating pambato, manatili pa rin tayong magbunyi at tanggapin nang buong sigla ang naabot ni Supsup. Kahit papaano, hindi biro ang mapasok sa Top 16, Top 10 at lalung-lalo na sa Top 5.

 

Congratulations Shamcey! Isa kang dagdag na matinding karangalan ng Pilipinas sa mundo. Mabuhay ka!

Si Rolando Mendoza, Si Venus Raj, At Ang Kapalaran Ng Pilipinas Sa Paningin Ng Mundo

.

Isang pananaw sa hindi normal na simula ng huling linggo ng Agosto para sa bansang Pilipinas.

Lunes ng gabi, ika-23 araw ng Agosto 2010. Nagngangalit ang kidlat at kulog at umiyak ang kalangitan sa Lungsod ng Maynila. Hindi kakaiba sa bansa dahil panahon na ng tag-ulan, pero hindi normal na gabi para sa bansang nag-uumpisa nang simulan ang bagong pagbabago sa bagong administrasyon.

Hinostage ang tourist bus ng mga Hong Kong nationals, kabilang ang ilang Pilipinong kasama nito ng isang dating pulis na kinilalang si senior police inspector Rolando Mendoza. Nauwi ang lahat sa isang madugong katapusan mula sa mapayapang paghingi nito ng demand sa pamahalaan dahil sa di-umano’y hindi makatarungang pagkakatanggal sa kanya sa serbisyo. Namatay si Mendoza sa kalunus-lunos nitong itsura, at sa mga oras na ito’ysampu na ang kumpirmadong patay at ilan pa ang ginagamot sa iba’t ibang mga ospital. Kagabi, halos wala pang isang oras pagkatapos ng insidente ay naglabas na ng travel ban ang pamahalaang Hong Kong at ilang mga bansa sa Asya laban sa Pilipinas. Naibalita sa mga international media outlet at nagimbal ang sambayanan sa isang hostage drama na nagpadagdag ng pangamba sa mata ng buong mundo…

(Larawan mula sa Associated Press)

.

Martes ng umaga, ika-24 ng Agosto 2010 (gabi sa Estados Unidos). Maaliwalas ang takbo ng mga ulap at walang binabadyang sama ng panahon. Isang kakatwang umaga mula sa isang malagim na gabi. Isang umagang muling ipinagbubunyi nating mga Pilipino sa loob ng 11 taon.

Nagawa ni Binibining Pilipinas-Universe Maria Venus Raj na ilagay ang Pilipinas sa Top 5 ng prestihiyosong Miss Universe 2010. Matatandaang ang pinakahuling Pilipinang nakapasok sa elite circle ng Top Miss Universe contenders ay si Miriam Quiambao noong 1999 sa Trinidad and Tobago. Sinubaybayan ng buong bayan sa telebisyon ang coronation night  at sinuportahan naman ng mga Pinoy sa Amerika na nanood sa mismong venue sa Mandalay Bay sa Las Vegas, Nevada USA, ginawa ni Raj ang kanyang makakaya upang makamit ang korona ng kagandahan na naging mailap sa ating bansa sa mahigit na tatlong dekada. Hindi man nagtagumpay, nakuha niya ang 4th runner-up position at ang nag-iisang Asyanong nakapasok sa top spot ng kompetisyon sa taong ito…

Trahedya, tagumpay, hindi maipaliwanag na emosyon, nakakabulabog na mga sitwasyon.

Maraming nagsasabing ang mga nangyayari kagabi ay isang kahiya-hiyang senaryo para sa ating bansa sa paningin ng ibang bansa. Maraming nagsasabing ang nangyari kanina ang babawi sa kahihiyang natanggap ng Pilipinas kagabi, kahit papaano.

Masakit sa mga nakaligtas ang maalalang namatay ang kanilang mga kaibigan sa kanilang tabi – sa isang kagimbal-gimbal na sandali. Masakit para sa isang taong nanghihingi ng katarungan ang nakikitang sinasaktan ang kanyang mga kaanak sa sitwasyong siya lang ang dapat na harapin. Masakit para sa ating bansa na sa isang iglap, sa isang eksenang ang isang naagrabiyado ay naghahangad na malinis ang kanyang pangalan, ang siyang magbibigay-dungis sa isyung panseguridad ng Pilipinas.

Sa kabilang banda, masayang makita na ang kinatawan natin ay nagtagumpay gamit ang kagandahang likas sa isang Pilipina. Masayang maramdamang isa tayo sa may pinakamagagandang nilalang sa buong mundo sa taong ito. Masaya pa ring sabihin, kahit papaano, na ikinararangal kong isa akong Pilipino.

Kung anuman ang mga nangyari sa atin sa mga nalalabing araw ng buwang ito, sabihin na nating ito’y itinadhana. Kung ito ang tadhana ng ating bayang minamahal, masasabi kong alam ng Diyos na kakayanin natin ang nagaganap sa kasalukuyan. Lagi nating sinasabi, hindi Niya tayo bibigyan ng pagsubok na hindi natin kayang solusyunan.

.

.

August 24, 2010 4:32pm

LemOrven